حسين القاصد

يكولون اكو قصص الف ليلة وليلة ، وكلشي مضكور بيها ، بينما يكول البعض اكو ليالي مزورة ، يعني مو أصلية ، يعني موش خوش !! جا هي كل ليلة ليلة ؟ ماعلينا ، لأن السالفة الصدكَـ هي ان العلامة العراقي محسن مهدي اثبت ان الليالي 400 ليلة والبقية مزورات !! وعلى كَولة حسن بريسم (موعلي بابا العراقي  سومري ومن اصل راقي ) ، بس اني ما اتضكر سالفة الاربعين حرامي مزورة لو صحيحة ، المهم ، كهرمان كاظه السطل مال الماي الحار وتريد تكظ الحرامي هاي كلها موجودة بالكرادة ، بس اكو سالفة غريبة كلش وهي ان الشرطة واكفين يم ساحة كهرمانة !! اكو سيارة مال شرطة ثابته هناك ، والسيارة واكفة بين كهرمانة والاربعين حرامي وبين الاربعين نجيفي اقصد المنطقة الخضراء ، يعني اللي يفلت من كهرمانة تكظه الشرطة وتطلع القضا والمضى ، ويجوز يتندم على اليوم اللي تعرف بيه على طارق الهاشمي ، هسة هذا شجابه بالسالفة ، صدك لازم له علاقة لأن يكولون اكو حرامية ماكظتهم كهرمانة ولا الشرطة والانتر (بوووول) ولا ( أنتر ) شايل سيفه .. لذلك وخوفا من ان يضيف المصريون والهنود ليالي مزورة جديدة ، وحتى نحافظ على ليالينا ومايهمنا اي شهر(زاد) او نقص !! لأن اهلنا يكولون : شهر اللي مالك بيه خبز لاتعد ايامه.