حسين القاصد
اكثر شي هالايام ينضكر بالكتب هو النقد الثقافي ، والوادم بكيفها ، ساعة يكولون سعودي وينسبونه للغذامي ، وساعة يكولون لا ، عمي ، ترى النقد الثقافي عراقي مأصل من جده وخاله ، ويرجع لعلي الوردي ، وصايرة مرادم !! والنواقيد (طبعا هاي الكلمة اطلقها على نقاد السهو ) يتراطنون وكلمن لازم (الميتا ) ويفتر على ماوراء النص !! والسالفة كلش سهلة ، واسهل منها ماكو ، وتحتاج طلابة !! مادام النقد الثقافي يشتغل على المضمر يعني مامعني بالظاهر ، فالعراق اكثر بلد معني بالنقد الثقافي ، لأن ابسط شي عند العراقيين هو خوفهم او توقعهم من المضمر ، واغلب العراقيين يهمهم الظاهر بس ماينسون المضمر ابد ، مثلا : هم دائما يدورون وجوه ، وحتى ابو المخضر يخلي بس الوجوه حتى يبيعها بالاخير ، بس اكو مثل شعبي يثبت بالدليل القاطع اشتغال العراقيين على المضمر واهتمامهم بالنقد الثقافي وهذا المثل يكول : (البطانة اغلى من الوجه !!) يعني بوية لاتنخدعون بالحيل الثقافية ، اهم شي البطانة .
