حسين القاصد
السفينة اللي تكثر ملاليحها تغركَـ هيجي اهلنه يكولون ، واربيل معناها اربعة إله!! هو إله واحد يغركَـ الدنيا والآخرة مو انوب اربعة !! جا طبعا تغرك ، وتصير عطلة وفيضانات، وحتى مجلس الوزراء مال ذيج الصفحة يعطل، المهم الجماعة جانو مطمئنين لأن الشعب المكَرود بس اله واحد لاشريك له ، وهم عدهم اربعة من غير التزوير، واول مافكرت الدنيا تمطر غركت اربيل ، وصارت كظ اخوك لايتيه، ويكولون ذولة الآله الاربعة خاتلين بقلعة اربيل وكلمن لازم ركن ويدورون مكسرات!! شكد عيب آلهة مال تالي وكت، راحت ايام هبل اللي جان امعيش العربان كلها والوادم تتعنى له من كل حدب وصوب (حدب ترهم هنا مو ؟؟) ماعلينا بالوادم، اخر خبر سمعته، يكولون اكو تصريح يستنكر حملة المطر التي تتعرض لها اربيل، والوادم رافعة شعار ( الف ايل ولا عبعوب واحد ) خاف عبالكم اربعة ايل شوية ؟؟ ، بس اني حاير بهذولة الاربعة !! كل واحد كم نبي ؟؟ وكم صلاة جمعة ؟؟ وكم داعش وكم قاعدة ؟؟ وكم سفينة ينراد حتى يخلصون من الطوفان ؟ وكم مطرة بعد حتى يحصلون على عبعوب خاص بيهم ..؟موش خوووووش .
