حسين القاصد
خرجت من البيت مبكرا ، كي لا تعرقلني اختناقات الشوارع الضرورية منها والمزاجية ، استوقفت تاكسي ، وبعد الاتفاق على الاجرة والمكان الذي انوي الذهاب اليه ، انطلقت بنا السايبة ، تحدثنا كثيرا ..
اكَلك عمي تدري هذا القانون مال التقاعد هو نفسه اللي كتبه عبد الكريم قاسم بقلمه ؟؟!!
_ شلون عمي ؟
آنه اكَلك بعد عمك ، هذا القانون يعاين للفقير ومحد فكّر بالفقير غير عبد الكريم قاسم ، جا لوماهو ـ رحمة الله على روحه ـ جا ياهو البنى الثورة ووزع الكَيعان ؟؟ وانه البارحة سمعت بالقانون هذا كلش زين ويعاين للفقير ، فكَلت الجماعة تعلموا خدمة الشعب من الزعيم كرومي .
_ بس عمي هذا القانون ينطي للي يداوم اربع سنوات بس تقاعد مايحلم بيه !! وهو الاربع سنوات حتى مايشتغل بيها وما اتضكر صوّت بس على قانون التقاعد .. انت تدري بعد عمك ان هذا القانون سووه علمود عائلة مطشر خاف يديحون ؟؟
لا العباس عليك ؟
_ اي وامامك علي ، والسالفة كلش موش زينة ، لأن الجماعة نصابهم يكمل بس على خراب البلد !!
وهسة عمي .. ؟
– هسة معناها صدك انكتل عبد الكريم قاسم لأن القانون صوّتوا عليه يضر بالشعب ويخلي اطفالنا يتحسرون على عيشة اطفال (النايبات) للظهر !!
اي بوية ، رحمة الله على روح الزعيم ، صدك هو موش من الدرجات الخاصة ، مايسووله تقاعد ويوزعونه على الفقراء مو هو ابو الفقراء ؟
_ بوية استر علينا لايحبسونه .. وين اكو فقراء بس الوادم متعافية وقلة ايمان عندهم !! مايحمدون الله ويشكرونه.
هم صحيح ، اكَلك عمي وين تنزل ، صار 3 ساعات افتر بيك ؟
_ والله عمي ، نسيت وين رايح ، دخت من التقاعد ومن الازدحامات ، مايصير ترجعني ؟؟
وين ارجعك ؟
_ لنفس المكان اللي صعدنا منّه ، جا غير نسيته ؟؟
امشينه بوية عساها بحظ وبخت قانون التقاعد.
