حسين القاصد
اني ما اعرفك ، ولا شايفك ، وحتى من عدموك اني بعدني مامخلوق ، ولا ابوي يعرف امي .
خوية كرومي بس اني احبك ، كلش احبك ، لأن انت فقير ، وخوش ادمي ، وتفتهم ، يعني حتى من ردت تجيب رئيس جامعة عينت عالم وتلميذ انشتاين وما اهتميت للثرثرة مالت المتخلفين .
اي خوية انت طيب اطيب من ريوكَـ السياح والكَيمر ، وانت ابن اوادم وعمرك ما تعيقلت على الشعب . ولاجبت كرايبك كلهم للحكومة .
كرومي ، احلى شي بيك ان الكل يحبك والكل يكرهك .. يكولون انت شيوعي والاسلاميون يكرهونك ، والشيوعيون يكولون انت انفردت بالسلطة ويكرهونك ، والبعثيون يموتون منك لأن انت بس متت استلموها وصارت الحروب تكَول كبسول مال التهابات كل ست ساعات حرب .
خوية كرومي ، انت عراقي ، وعلي بن ابي طالب انت عراقي ، جا مايتعلمون منك جماعة التقاعد ويصيرون عراقيين ؟
بس بالتقاعد يركضون ركض !! والشوارع كلها طين ومحد يصوت على البنى التحتية .. هم زين عدنه جامعة سواها كرومي جا هسة بالضيم !!
الف رحمة على روحك عبد الكريم قاسم ستبقى بصماتك واضحة لأن من يأتي بعدك لايستطيع ان يقدم ماقدمته انت في اربع سنوات فقط . لك الرحمة والخلود واللعنة على قاتليك .
