حسين القاصد
بعد (شرم الشيخ ) وتداعيات ثقب الأوزون ، وتوقع صيف حار جدا ـ من التنور للغرفة مباشرةً ـ بعد كل هاي الطلايب (كفر الشيخ ) وهاي مدينة بمصر ، بس لحد الان مايعرفون ياشيخ منهم اللي كفر !! اذا هي تايهة وكلها تصلي جمعة !! ، المشكلة الأخرى يكولون اكو واحد اسمه محمود ضايج من احد الشيوخ لأن كفر!! وهذا محمود اخذه الواهس من بعيد !! وكفر لأن لاعمليات الانبار خلصانة ولا الموازنة حاسمين سالفتها وحايرين بالتقاعد مال مطشر الدايح ، ماعلينا بالوادم .. المهم محمود ماخذينه يحققون وياه ، وسألوه ليش كفرت ؟؟ مو انت خطيب جمعة وراتبك ماشي من غير الحبشكلات !! ؟ بس محمود مايكَدر يحجي ، لأن يريد يرشح للانتخابات وقبل لايرشح انسحب !! هاي السالفة بعد ما ترس الشارع لافتات يعيش اياد علاوي ولاتتخلوا عن حسن العلوي ، الوادم ماسألت اياد علاوي لأن جوابه الدائم (ما ادري !! ) راحوا سألوا حسن العلوي ، يابه ليش محمود كفر ؟؟ وليش يريد ينسحب من الانتخابات ؟؟ .. خطية حسن العلوي راسا صخن وكَال : يامدرعة !! اني ماكانت نيتي أأجرها للاكراد ، جنت اريد انطيها لمحمود بس من سمعت ( محمود كفر ) كلت شيخلصني من الجماعة لأن شلون اسرق مال الدولة واعطيه للكافر ، ومن لحظتها محمود بقى يومية يكفر ويهمبل على الوادم ، ساعة يريد موازنة كل ست ساعات تكول كبسول مال التهابات !! وساعة يكول : كفرت من شفت الوادم ميتين من الجوع والنجيفي مصطحب حتى اطفال اخوته في وفد رسمي على نفقة الموازنة اللي بعدها ما صايرة ولا دايرة . اخر سؤال سألوه وجاوب عليه محمود بقوة ، كال : شو تجون بس على محمود ؟ ما اعترضتوا من ( كفر الشيخ ) وصوت على التقاعد مال مطشر ؟
