حسين القاصد
اللهجة العراقية ولّادة بس مو بنت المستكفي، يعني ماكو لهجة بالدنيا فيها سؤال شامل كامل ( هذا مو اسم شخص ، لابوية صفات للسؤال ) مثل : شكو ماكو ، ويومية تنضاف مفردات جديدة للهجة العراقية حسب مقتضى الحال ، وبالطائفية انضافت كلمات بسبب الحاجة الماسة لها مثل ( العلاس ) و ( الصكاك ) ، ومن شدة اشتياقهم للحديقة ولأنهم يشعرون باحتياج شديد للحدايق والمتنزهات اللي لو صارت بيوت مال حواسم لو استولت عليها الاحزاب .. ماعلينا بالوادم، ربعنا يشبهون الماعنده شغل يلعب بـ … لا هاي وين ؟؟ يشبهون الماعنده شغل بالحديقة ، وهو تشبيه المفروض حلو لأن الحديقة تعبر عن الحياة والامل والاخضرار ، لكن العراقيين لشدة ذكائهم سموا العاطل عن العمل والامل معا بالحديقة . لأن الحديقة في العراق الجديد اللي بالباكيت مهملة جدا وعبارة عن حديقة !! لاشغل ولاعمل ولا أمل . وسالفة التسميات العراقية قديمة لأنهم دائما يخترعون كلمات توافق مقتضى الحال ، مثلا لحد الان يسمون لفة الفلافل لفة (عنبة) مع دخول الصاص والمقبلات، وعلى (ضكر ) المقبلات اتضكر بالثمانينيات كنت اتمشى بشارع السعدون، والمحلات كلها مفتحة والسينمات وجان ازدحام على الفيلم مال بروسلي يشبه الازدحام على المصارف بيوم المنحة مال الادباء !! بلا تشابيه . واتضكر كاتبين اعلان بالمطعم فلافل حارة مع مقبلات لبنانية ، جنت بيها شاب وشايل خشمي ، كلت خل اطب اشوف اللبنانيات !! طلعت المقبلات زلاطة !! جا ماتكَولون زلاطة تطبون للنار ؟؟ اني طبيت وكل عقلي راح تجي لبنانية تبوسني واشتغلت عندي بوقتها كل مصطلحات النقد من بؤرة التوتر اللي وصلت لاخوة موزة !! الى ( الميتا ماوراء ) اويلي على الميتا !! ، ماعلينا ، كل اللي اريده من القارئ الكريم هو ان لايدوخ ولايفتهمني غلط .. هذا المقال مجرد (حبشكلات ) !!
