كريم السيد
-الووووو هلو حبيبي شونك؟!
-هلاو حياتي آني بخير شونج إنتي؟!
-الحمد لله, بس شويه تعبانه هاي الايام, تعرف ماما وبابا نازلين عالانتخابات وبيتنه صاير ناس طابه ناس طالعة ما أحجيلك فد هوسه كوووولش قوية!.
– اووو هاي انتم مثلنا, طبعن تعرفين بابا رشح نفسه عالانتخابات مرة اللوووخ لان حبيبي ما اخفيج تعلمنا عالصرف والطبّه والطلعة واذا عالتقاعد هذا الشعب يفتر ورانه حسد عيشه عبالك بس أبويه لح ياخذ تقاعد بالعراق وهن شكد يعني كووولهن فد عشر ملايين دينار شهريا! -اي عفية صايريلي ثوريين, المهم اني دا اقنع بصديقاتي وكل معارفي حتى ينتخبون ماما لان تعرف ماما بالدائرة حيل منسقه امورها بس لازم نصعد اعلى قابل فلانه وفلتانه احسن منها؟. أما بابا فصاعد لان رئيس الكتلة كله انت نريدك خوش تعلكها تحت القبه ههههههههه. -طبعا ههههههههه, اني السنة قررت اطلع من العراق اصلا بس خل بابا يفوز وراها أشلع, بالمناسبة تحبين ابقى علمودج حتى نداوم سويه بالكوووليه؟! -وين هنا؟؟؟ عووووع, أني؟؟ لا حرام عليك, اني اداوم هنا وي هذوله؟ يممممه, ما, لح اخلي عمو الوزير يشوفلي جامعة بالخارج احسن شنو هنا اموت ولا ادخل يوم واحد بهاي الكوليات التعبانه!!.
– اوكي لعد اني هم خالي وزير لح ارتب وياه يشوفنه تعيين بسفارة مرتبه وهماتين ندوام بنفس الجامعة ونعيش أحلى حب على حساب الدولة, هههههههه ديالله قابل مال أبو واحد هيه؟!
– اي عفيه لو تدري ماما شلون متحزمة بحيث جتي العشيرة كولها, بعنا اللي عدنا والما عدنا وشكم فلس اللي مخليهن بالخارج مال مقاولات قديمة وجان تسوي مؤتمر كبير تحت عنوان (عشيرتنا تدعم ابنتها البارّة) وجان ندز عالمنطقة سيارات وغديات وعشيات وكل واحد ظرف فلوسه بيده والله خطية دتخسر هوايه بس أكيد ميروحن حيتعوضن بالاكثر منهن بضربة وحدة.
-اكيد حبيبي لعد اني ابوية خسر الانتخابات الفاتت ملايين الدنانير بحيث بعنا البيت اللي اخذه بالجادرية وسحبنا هواي مصارف وجان عوزه للوزارة شي قليل بس بابا قنع بالبرلمان اقلاها بعيد عن العين وشيريد كتلته تسويه, بعدها عيّن اقاربي وجماعتهم ذولي هم تعرفين يفيدونه بأصواتهم ولح نسوي مؤتمر كولش كبير حيروح بابا لمحافظتهم هذوله العرب على اساس تستقبله العشيرة وكولها شغل شهرين لحد ما تجي الاصوات وراها انساني ومتفتكرنيش!.
-اكولك بس تره ابوك صايره عليه هوسه هالايام بالتلفزيون لان كتلتهم حرامية علني ميعرفون شلون يبوكون!.
-ديالله علساس كتلة أمج النزيهة, هسه علينا, شحال لوما ملفاتهم مالت العقود والارهاب كوولها شفتها بيد عموو اشتراها بدفاتر لو هم تحبين ينباعن بالاعلام؟؟!!
-احترم نفسك احنه نبوك ونزور ونغش اي بس مال نقتل مستحيل هذا ثوبكم يا قتلة يا مجرمين يا مشايفين مناصب وحكم والله وكت تصير بديكم انتم….اخ أخ!!
-ديالله خل نشوف امج الشفية شراح تسوي, هاي اذا مزورت شكم محطة لصالحهه وبالنسبة للدراسة والطلعة والسفارة ووو انسي كولشي واحلمي بعد!
-ديالله عساس ناقصتلك آني اصلا خالوو انطاني اكثر من مكان ورفضت لان مالي خلوووك.
-دقيقة, لج شنو هاي مدا أصدك؟؟؟؟؟
-ها شكو شبيك؟!
-لج عاجل بالتلفزيون المفوضية تستبعد ابوية وامج من الانتخابات, نعله على, راح الحب والاحلام رااااااحت!!
_الووووو الوووو الووووو…طووط طوووط طووووط
ملاحظة: الحوار هو من وحي الخيال وليس له أصل من الواقع أما في حالة انطباقه فهي صدفة, ورب صدفة خير من ألف بسمار!
