كاظم السيد علي
يوم 6 نيسان من العام 2008 ودعت مدينة “الحسچة” الديوانية الأثيرة شاعرها المبدع كامل العامري، الذي وافاه الأجل عن عمر ناهز الـ 64 عاماً كان حافلاً بالمواقف الأدبية والسياسية، وذلك بسبب مرضه (التهاب القصبات والرئة) والذي جعله جليس الدار بعيداً عن الشعر والشعراء..
يعد العامري من أهم الشعراء الشعبيين في العراق .. ولد العام 1944 في الديوانية، لمعت موهبته منذ دراسته المتوسطة فأحبّ الأدب وتعلق به حتى أصبح جزءاً لايتجزأ منه، واستطاع أن يثبت مكانته في هذا المضمار، بعد أن قطع شوطاً كبيراً في ميدانه، بتنوع عطائه في مجالات الأدب بين الفصيح والحسچة والأغنية.
بدأ مسيرته منطلقا من أغانٍ شفيفة رائعة (گوم انثر الهيل .. أفيش بروج الحنيّة.. جاوبني تدري الوكت).. وغيرها من جميلات الأغاني.
كامل العامري شاعر مجدّد وملتزم.. طموحه لاحدّ له، شغوف في البحث عن الجديد، يميل إلى الحداثة في قصائده. والبيئة التي احاطت بحياته في شبابه، واطلاعه على الثقافة الماركسية وكتب الشيوعية العلمية أثرت في تفكيره وفي تكوينه الثقافي كثيراً ، وظهر هذا التأثر واضحاً في كتاباته الشعرية كلها، ويكاد لايترك مناسبة إلا ويعبر عن التزامه الشديد بالقضايا الوطنية، وقصيدة “إلى شهيد” دليلنا على صدق القول ، فهذه القصيدة كتبها عن الشهيد محمد الخضري الذي اغتيل على أيدي جلاوزة البعث الفاشي يوم 22 /3 /1970 ووجدت جثته بالقرب من مدينة “بلد” وقد اخترقتها أكثر من أربعين اطلاقة ، أما القصيدة ” الى شهيد “فقد نشرتها مجلة “الثقافة الجديدة” في العدد (14)، ويقول فيها:
(إليك يامن سافرتَ بلا شكوى ..
لقد كنتَ بيننا..
وستبقى حتى نمدّ لك أشرعة النصر..
لتحيا من جديد)
بجينه وما بجينه عليك
ياجلمة بحلك تاريخ
دكت فوك وجنات الزمان بدور
بجينه بدم…سرج مهره..
كبل ما ياخذ بثاره ويبشر أور
بجينه شنعتذر لو عاتبت بابل..
بجينه شنعتذر لو عاتبت آشور
بجينه…
وما بجينه عليك…
ندريبك عدل والموت ..بيك الموت..وأنته الموت
فنه الموت يمحمد عليك أيفوت
يلخطيت بجروحك درب ثوار
يلشكيت من هام السمه للكاع سجة نار
يمحمد…
حمامات السجن يتنشدن ظلن
يمحمد..كطايات الشلب حنن
دكلي شنعتذر للماي واطراف السعف والهور لو عتبن
يمحمد بيارغنه وضحايانه..
تمد فوك الحياة جسور
موش احنه شمس
وافكارنه بدرب الكواين والزمان اتنور
موش احنه حلم ريان
ويرفرف على جفون الصبح رايه
موش احنه نبع ..
يطلك على دموع الحزن مايه
موش احنه شتلنه ارواحنه ابهذا الدرب ثايه
ما نبجي على ذاك الفاج ماي الموت
واتعنه الوفه وما ذلن ايامه
ما نبجي على ذاك الفارس الما عثرن اجدامه
ما نبجيك..هنيالك والف هنيال..
كلمن شال زاد العمر بجفوفه
ما نبجيك هنيالك والف هنيال …كل خيّال ..
ما هد الرسن مره وطفح خوفه
ما نبجيك..لو ندري البواجي تفيد
ما خلينه من ماي الدمع كطره
ما نبجيك.. لو دمع البواجي يفيد
جا فاض الفرات و(حسن) ردّ عمره
وجا ظلت ازغار كبار..
بلجن يرجع حسين وجمال وعادل وجبار
وجا دجله بكت تنحب…
ثلث توكات…يوم بيوم
بلجن يرد من تنحب عمر (ستار )
ندريبك خذت صوغه ورحت طارش
تودي اخبارنه الحازم
تودي اخبارنه الصارم
ولكلمن شتل كلبه وطرش كبلك
تودي اخبارنه الكلمن
بهذا الدرب حط رجله
يا نفحة ورد نيسان..
يا شيلة الراس وهيبة الديوان
فهد يتنطرك يمحمد ويتنطر أخبارك
دكله احنه
هذوله احنه
بعدنه احنه
ترف راياتنه ونمشي بضوه افكارك
يمحمد دكله أحنه
هذوله أحنه
زلم خشنين تدرينه
نرش أجروحنه بماي وملح
ما يوم ذلينه
نفك ليل الحزن بالدم ..ولا نهتم..
يشامت روح دوّر
كل تواريخ النضال وشوف أسامينه
يشامت فوگ هامات النجم والغيم تلگينه
يشامت روح وانشد ثورة أكتوبر
وانشد كل كتر بالصين
وانشد صوفيا وبرلين
وانشد سچة الغابات
تلگه بكل شبر منها يشع فوگ العشب دمنه
حبــــــال الصلب تتباهه گَلايد فوگ ركبتنه
يشامت روح وانشــد عالجسر تذكار وثبتنه
هذوله أحنه
بعدنه أحنه
خضيري الهور يتغنه بسوالفنه
ومدّ الماي بينه يفيض لو رفت شفايفنه
وحگ بيرغ حزبنه … وهامة الطيبين..
تشهد بينه مــــــن ذاك الوكت لليوم دنيتنه
أبد ما ردت اجدام العزم بينه
ولا خفتت مواگدنه
وهاي الشمس تضوي بنور چلمتنه
بگول وفعل ذوله أحنه…
تشبه صفة الفالات صفتنه
يمحمد شوصفك والوصف يكصر
ومهر الصوت يمحمد…
على أشفاف الدهر يعثر
يمحمد شوصف بيك
وانته على الوصف تكبر
يلعمرك نبع تاريخ
ولد الولد لو مرت يفيض الزود بيك أكثر
يلمديت روحك للفجر معبر
يمحمد بجينه وما بجينه عليك
يا شمعة عرس يلدمك زواكه
يمحمد بجينه بجفن الموادع
وكل أحنه على هذه الدرب نتلاكه
يمحمد يريت أردود
لينه تعود
وأشمّن كل كتر..بيه نامن جروحك وأشمنك
وأشهك حيل … حيل الحيل
ريت أنه والف يا ريت
عيني توجد أجدامك وأتبعنك..
