أدهم عادل
من اول خيط يعد روحه
عال شباج
لوشالة ضوه بسرداب
ويه الوجع عندي عتاب
طفيت الحرك بالروح
وشرعت العمر بستان
رجيته اعلى طين الهور
ما شوفته صم تراب
وخيمت السنين اللبستهن ثوب
وبيهن دورت عن جيب ما مفتوك
ضميت النسيم الهاب
وما خليت شكـَ بباب
ومدري شلون طبت ريحة العطاب
وفتح باب وغلكـَ باب
وغلكـَ باب وفتح باب
والكـَي الروح كسرة خبز
مشي بواهس متيهين
ما اعرف منيتي منين
بس ريحة دمع شميت فوك الطين
.. لحكـَــته
ووجدت بالدرب خوش صواب
خليته بشليلي بليل والهث خوف
والكـَمرة وحش والنجم لمض نياب
والريح التعت بثيابي جف ثياب
وطكـَ ثيل بياض براسي جان
من الحزن يحلم يلبسه غراب
بهذا الخوف والوهواس
وبس ظنوني تمشي وياي مامش ناس
لكـَـيت الشجرة كـَـبعت روحها من العيب
وكَـصايبها الخضر من خط عليها الشيب
شما رادت تضمها يكّـصها جف حطاب
وطحت جلمه غريبه
بلا شكل لا لون مدري بيا طواري انجاب
لا آنه بكفر والسكر تالي الليل
ولا دعوه بفجر وطلع من المحراب
ولا ارهم شعر ويخطني شاعر شاب
ولا تيهت روحي روحي بهيمة الجذاب
