أبراهيم الجابري
شفت عيونهه ونثرت دمع عالگاع
وخضرت بالارض شجرة عتب مضموم
لجمتني صدك لن تحچي مو بلسان
نطقت عينهه وسجنت براسي اللوم
گالت ها يولفي بزفتك عالخير
مو عالخير قصدي لغيري صرت اليوم
وگَفت اگبال ذلهه اوَكفت لعقول
لن سطرتني صفنه بعبرة المعدوم
وبدت ذيج الهلاهل تعزف الشمات
واحس استشهدت واحلامي كلهه ادموم
نسمة وشاورت شمعة اعله سر الليل
طفت واتطشر بغفلة الضوه الملموم
بهاي الحالة امشي وبالي يحجي فراك
وعلى حس الطبل ثگلت رجلي اهموم
الوكت ايده طويلة وباگ ضحك اصباي
على خفة اجفوفه شچم بشر محروم
اهله واهلي والجيران والعدوان
قسمونه وتگلي العشگ ما مقسوم
ودوني الغرفتي ابالي اجه السرداب
دخلت ابليلتي وجانت بليه انجوم
زفوني بجسد مهجور مابيه روح
بوجه يشبه ملامح جثة المسموم
وصوهة بعد من تذكر اسمي انوب
تقرأه الفاتحة ولا تبجي عالمرحوم
