احمد حسين
جسمي مستغرب رحيلك
وأني مزروع بأديك
رحت راح أتصوغ كائن
والله ميت مو عليك
جان بيك أيتاني ثغره
بلكي ترمشله ويعيش
وهسه بوابة حياتك
فتحت بأحضانه ليش؟
وأني يمك جرحي أعمى
منذ آلاف ألعيون
ما أحس بوجاع غدرك
بس تألمني ألظنون
من تمر صورة أظفرك
تمشي فوك خدوده ورده
لمن أصفن وألكه زندك
حايك براسه ألمخدة
دور سنيني بثيابك
تلكه أيامي أصطفاف
چن أرامل ترجو منك
تمطر بهيئة زفاف
ألثلج سد ذكرياتي
بالله شخبار أللحاف؟
ألدفو ألنام عله طولك
ماخذ من ضلوعي ساف
جردت روحي بصفنتي
بس نبي عايش فراغي
من أعيش وياك صفنة
أسمع ألصخرة تناغي
هيج من تمر طعنتك
ورم ويطوف بدماغي
كلت أسوي براسي حادث
بلكي افقد ذكرياتي
لا ملازم جاني يركض
طيفك وفاقد حياتي
يستحي وماجاب عمري
جاني شايل لون وجهك
احمر من الضحكة وانكر
لاجذب واحد يشبهك
شكد مآسي حجيت بيها
بس مكتلي شلون اكرهك
بس كلتلي شلون ادمع
واهدم اركان الهدوء
بموقفك دمع اليتامه
بعيني طب ياخذ لجوء
