كاظم الركابي

شمعه اِترف
وكل الظلمه اِبوجه الشمعه
أف .. أف .. أف
شارع طفهه اِيگل للشارع
واِحلوگ البيبان اِمشرعه
تنزف منهه الظلمه وتنفخ
أف .. أف .. أف
تطفه واِيوجهه الهوى
وبالريه طش الهوى
واللي ما يهوه الهوى
ميت تراهو هو..
لا جرح عنده ولا دف
دف .. دف .. دف
حنه و ما يمحيهه الماي الخابط من الچف
وحنينه اِبدمك يحبيّب .. اِهوايه اِچفوف
خافن ينشدنه المتشمت بهويتنه
أنگله شوف
بچوني .. بچوني ورادوني أنزف .. حبري ..
دمعات البيهه أكتب شعري
يا جفني لا اِتوگع الدمعه ..
وخلي الدمعه اِبجفني أترف ..
قف ..قف .. قف
اِلقاء القبض اِعله الدمعه ..
اِتحروا كل طليّعه اِو ورده
كل فانوس .. وكل اِعگال ,, وكل اِمخده
وكل طفل اِمن اِعضود البردي أملولح مهده
وكل اِشفايف شاعر غنه ..
اِعله المد الما تجزر مده
أتحروا كل اِجفون الدنيه… لچن
يخسه اليكشف ..
بين اِجفوني وبين اِجفونك ..
وبين اِجفون الدنيه الطيبه ..
الدمعه الطيبه .. الشمعه الطيبه .. أترف .. وأترف .. وأترف
…………………………………..
* القصيدة مُهداة الى الشهيد عبد الخالق محجوب المناضل الشيوعي السوداني البارز ..