وزن الحدي

أحد أوزان الشعر الشعبي العراقي المشتقة من بحر الرجز وهو مجزوء الرجز ، حيث كان يسمى قديماً في محافظة بابل بـ ( الشوملي ) والشوملي ناحية تابعة لقضاء المدحتية في محافظة بابل وسمية بهذا الأسم نسبة الى قصيدة أشتهرت في هذه المدينة . ومطلعها :

عالشوملي .. وعالشوملي

نارك .. ولا جنة هلي

شفته على بير الجرد وأمترس أعبوبه ورد

كَتله يبو كَذيله درد لفرش حصر وأطرد هلي

عالشوملي … وعالشوملي

(( وفيه تراكيب فنية منها الرباعي والنص والمفتوح . ))

وهذا نص مفتوح( للشاعر كامل سواري ):

من يشتري .. من يشتري .. وسط المزاد العلني

إسمي وهويتي ودفتري .. قررت أظل بلا وطن

رحّال حظي وقدري .. قررت أصيرن غجري

من يشتري قيثارتي .. وحبي وعواطف وتري

وشعري وجوازي .. وحتى فيزة سفري

ومن يشتري …

نكَطة حيائي ..

وفرس جدي وصايته .. وحته سفيفة خنجري

قررت أهاجر عن وطن .. طبّه مغولي وتتري

قررت أصيرن غجري .

مثال آخر للشاعر كاظم أسماعيل الكاطع :

شمام ظلمه محبتي ( مستفعلن / مستفعلن ) 

وديلي من خدك ضوه (مستفعلن / مستفعلن )

مقفوله نيات العشك ( مستفعلن / مستفعلن )

وأنته شبابيج وهوه ( مستفعلن / مستفعلن )

ومسدوده بيبان العشك ( مستفعلن / مستفعلن )

وأنته مفاتيح وضوه ( مستفعلن / مستفعلن )

مهجوره بيبان العشك ( مستفعلن / مستفعلن )

طفيني مابيه احترك ( مستفعلن / مستفعلن )

كل الجروح أتلايمت ( مستفعلن / مستفعلن )

بس جرحي ظل بلا دوه ( مستفعلن / مستفعلن )

واكَلوبنه من أول عشك شبن سوه ( مستفعلن / مستفعلن / مستفعلن )

مثال للشاعر مظفر النواب :

شفافك ولا أكَولن ورد ( مستفعلن / مستفعلن )

جوريه معكَوده عكَد ( مستفعلن / مستفعلن )

لا هي دفو .. لا هي برد ( مستفعلن / مستفعلن )

أنه أبوصفهه راح أجن ( مستفعلن / مستفعلن )

حن .. وأنه أحن ( مستفعلن )

جفنك جنح فراشه غض ( مستفعلن / مستفعلن )

وحجاره جفني وماغمض ( مستفعلن / مستفعلن )

يالتمشي بيه أويه النبض ( مستفعلن / مستفعلن )

روحي أعله روحك تنسحن ( مستفعلن / مستفعلن )

حن … وأنه أحن .. ( مستفعلن )