يم طاريك تخشع هامه الروح
وي الغيم الك بصمات خليت
ع الفقره تسولف جنك العوز
ورغيف بكل قصيده تملح البيت
تتمرجح بكلبك شوغه افراك
وتميل اعله روحك لو اضطريت
يالجايب حياتك كلهه ضربات
ومن اقربك اعزازك طعنه ضميت
فاضت مفرداتك دنك الماي
وبصدره عجز تذكار خليت
علمته السوالف تيبس ابساع
اذ للروجه طاري افراك وديت
يالمشكل حضور بوكت الغياب
وحاضر بالترافه وانت ماجيت
اليتيهك يدور بالمنصات
من طبعه الخشب ماينسه الجفوف
حلوه سوالفك مو مره بالذوگ
وعله برحي خيالك يخدر الطوف
الصريفه تصير مهر وتصهل وياك
تره وجه القصور ملثم بخوف
من تحوك السوالف يشبج الليل
بجفوف المغازل يخدر الصوف
ابالك موش جلمه اتعيش لجمات
واتدلي ضمير متيه الشوف
اليعطش ماي يروى برشفه احساس
يدهله رقه اشربك وانتشي جروف
من تصفن محنه يوصفر الياس
وعلى خد القصيده اتطرز ازلوف
البروحه ضوه متانيله شباج
يفتحله شمس ويوزع طيوف
يالمكضيهه مترد حتى شمات
بابك ماتسده بوجه اليحوف
خله الكمر عوفه بجفهم يموت
اصلا هذا واحد توه مخسوف
ملجوم ودواك بومضه بت بروح
و الديوان يشفه بطاري الضيوف
