انتي وي خيط الفجر ..

وبأول الشباچ خضرتي قصيدة

 .. فاحت حروفچ محّنه بكل كتر

 …. رسمن اعلى الكَاع واوراقي القديمة ودمعتي ضحكة زغر

 وانتشى وياچ الفجر .. 

 الفجر سكران مايرضه يطر 

عمَّد طيوف الحزن بانفاس روح ..

 ذاب وي ريحة عباتچ

 صفنه صفنه 

وغنّه كل عمره الچ 

منه طاحت بين ايديچ سنين وحشه

 وعثرت ابوسة ضحكتچ 

أخ وبرمشة حنانچ ردت لفرحة عرسها تغني بستات الأمل

 صلت بحضرة حنانچ كل عصافير المدينة وركضت الخطوات تتنفس عشك

 …. والتهه يبوس بضحكتچ كل نده الروح الحزين الزاعل ورود الصباح .

.ومنچ القداح أخذ شبكة عطر 

كلها سكرت بالعطر

 حتى اهات الزوايا الحاضنة الذكرى الاليمة وزاعلت حنة فرحها … تعّطرن بچفوف ياسچ واشتهن طيبة كعدتچ، والسوالف ..

 شابگن عطر المحّنة .. 

وچنها توها الدنيا عدهن وردّت ..

 طلعن مراياتهّن، فلن شعرهّن .. مشَطنّه

 …. وحنّن خيوط الفجر منه بضحكتچ

 آه ياخيط الشمس بايك ضحكتچ .. 

والنجوم التوهه هسه حديثة نامت بين ايديچ

 بلا وعي تغازل حلمها طيوف عطرچ

 آه يا انتي يشباچ الدعاء النامت سنين العشگ كلها بحضرتچ

… انتِ قديسة ورد وبحضرتچ كلها تطوف

 …تعطّر وبّاقي عمرها چفوف شوك بلايه شوف

 انتي لو من بخت عطرچ فاح مرّه عله البشر مامرهه خوف 

اخ يا انتي شكثر مليانه طيبه، وكل جزء منچ شهك خضّر سعد

 اخ منچ من شبكتچ يستحي يفَتْح ورد

 شنهي دنية بلا ضحِكْتِچ چنها لون الصحرا باهت 

والوحوش بليلها تبوگ بعمرنه

 وشنهي عين الماتشوفچ بيها مامش لون     يضحك

… هندس يصّبح ضواها وتختنك فرحة دربنه.. 

ياطعم محد عرف شنهي نكهته ..

.وياحزن كل عاشكَـ  مضيع فرحته

 .. يا …يمن ماادري شنهي ..وياحرت يا مدري شنهي انتي الي؟

 ومدري شنهي البيچ وبروحي انعجن

 .. ياعشكَـ  ماصدكـ بيوم اندفن

 .. انتِ وي كل نفس يصعد يصرخ أمي

 آه يا أمي

اشكبر بخت الكَاع ذيچ المرت جدامج عليها

تخضر بكل لحظه طيب، وتسكر الدنيا بعطرها

 آه يا أجمل سكر ..

 آه يا اخر سكر .. 

بعدچ الشارع حزين وعتبة البيبان ماترضه عليچ اتفك حزنها

 .. بعدچ چفوف العشك مابيها روح

 ونامت بحضن الثلج من غير صوت

 آه يا اخر عشك لو سكتة مات بلايه صوت 

آه يا أجمل عشك لو سكته مات بلايه صوت .