سلوان عدنان الفضلي
بده العباس يرسم لوحه للطف
ويم العلكمي نزل جربته
واجت زينب تمثل دور الاستاذ
تكله ارسم طفل نزلت دمعته
تكله ارسم خيال واهس فراك
صفن عباس وانباكت ضحكته
عل اليمنه مخيم بابه محروك
جبت خيال ويه امي وسترته
لحظه ولن اشوفن زينب تصيح
رسم عباس وانتفضت مهرته
يالله حسين عجل كمل الدور
بس حافر مهرته اهناك شفته
يالله حسين عجل صارو تلال
رجع عباس والضحكه بوجنته
ها زينب يخيتي بهاي كفيت
علم السيف يم حيدر درسته
خويه الماي ماكو وعندك ايتام
وابن حسين هل ماعت جبدته
ركض عباس طر الجيش نصين
وأول ماغرف طاحت يمنته
ذبه وكال يالله اليمنه شتفيد
المهم عبدالله ماتخرب ضحكته
رجعت ولن اهيس مهرتي اتصيح
اظن عبدالله هل حصدوا ركبته
بعدني ويل الطريج وطشوا الماي
وسمعت حسين يلكافل خسرته
يالله الدور خلص رايد تموت
خلص عباس هل سلم رسمته
جا زينب يخويه وهاي الايتام
اظن كرار يلكافل وعدته
يالله حسين ارسم حالي شيصير
وللكرار تنطيه الرسمته
ارسم حالي هذا وهاي الجروح
بس الهامه لايذكر طبرته
وقع للحدث وتشاهد حسين
وللحوراء هم سلم رسمته
