حامد كعيد الجبوري
زغار ، نلعب بالعكد ختيله
نركُض أبعكد (الشيخ والسرحه وبيات)
نختل أبيت (عباس البياتي أبوزينب)
وبيت (أبو عباس فاضل ، أبن مردان ) ، الشقاوه
زلـمَه من حق ومراجل
أبشاربه وخنجرَه غيره
أبطيب مفتوحه البيوت
من سطح … نُعبر سطح
نوصل البيت (أبن كناي ،عباس أبوعمشه)
ياعيني ….
….أبوعمشه
بلون الكاع …. أسمر
غسل وَجهه ..
حتى أيصير أحله …
صُبَح مثل أتراب حُري
أملوّن أبدهلة فرات
أشتحفره تشتَم عبيره
عاش بعكود المحنه
وروّتَه ..طيب وحنان
فاكد الأم والأبو
وعلى الفطره ..
صار أبو الكل اليتامه
رسَب سادس أبتدائي…..
وشملَه زحف الزعيم
ينجح أبكل الدروس …
ألا…درس الأنكليزي
لأن ماحب أنكليز
وبطـَل وعاف الدراسه
أتثقف أبحب المحَله
ويحلِف أبخبزة الفقره
ماقره (هيكل وماركس)
ولاعرف (فائض القيمه)
ولاقره (اللينين وستالين وجيفاره ) ونضاله
جان أبو عمشه فُكر
ما ورَث أبيض وأصفر
ولا ترك أبيض وأصفر
ولا عرف طعم المرَه
وعاشك …وعاشك جبير
وكَـلُب…ينبض بيه وطن
أبو عمشه ….
أطيب من الماي وأصعَب من جبل
كتَب عالحيطان بعكود المحله
مو صبغ أحمر كتبها
أنكتبت أبدم العراق
(وطن حر وشعب سعيد)
وبعكد آخر كتب
(الضمائر الشريفه لاتباع بالدنانير)
أتطوقت (الورديه)…
وجت شرطه ، وعساكر
وأنفُـرض حـضر التجول…
وما بعد ختيله نلعب
كالو ..وكالو ..وكالو
كالو الكاتبهه واعي
وكالو الكاتبهه مُلـحد
يريد يبني …
وطن حر بلا قيود
يريد يبني …
مدرسه ومرجوحه وحدايق
تنزرع حب أورود
ملحد وجاحد حقود
كافر اليزرع ورود …
