( 5 )
رحيم العراقي
جنان : إنتو بيا حال و تغازلون و تضحكون ..المكان تدمر و محلاتكم تخلخلت ..
رزق : يعني تريدين ندردم.؟..شيصير خلي يصير ..ماكو فرق الحرارة هنا بالعراق بالصيف50 وبجهنم 60 ..
جنان :لا.. لازم تعبرون عن غضبكم ..لأن الحالة متنحمل ..
( يظهر مصلح المستشار يتبعه فارس غضبان حاملا الحقيبة ..يجلس على مقعد المقهى على قارعة الطريق.. فارس ينادي ريسان ..)
فارس :چاي ونركَيله تفاح للأستاذ مصلح.. وآني حامض..
ريسان : إنت حامض..؟.أخ حامض آني مدري وين شايفك ..وين تلتقي ..؟.
فارس: اني ..أشرب حامض.. و ما شايفك و ما ألتقي بأي مكان..
جنان : رزق.. هذا أستاذ مصلح مستشار القناة ، صراف، اريدك تتكلم زين ..
صباح : جنان ..هذا مصلح المستشار..
جنان : أعرف.. شفته ..نبدأ ..
صباح : أنا جاهز..
جنان: تفضل أخ رزق تكلم عن وضعك حال حدوث الإنفجار الصوتي.. وبعدين عـّبر عن مشاعرك و كل شي تحب تكَوله ..
( رضوان يترك مكانه و يقف خلف رزق ليظهر في اللقطات و يجاهد في إفتعال الحركات )
رزق : چنت نايم بالبلكونه هذي.. وأشخر..
رضوان : انا اشهد چان نايم بالبلكونه و يشخر كل المسؤولين على جهودهم..
رزق: وسمعت صوت انفجار..
رضوان : صحيح ..سمع صوت الإنفجار.. رزق من الناس اللي يسمعون كل شي.. ما عدا كلامي على زيادة الإيجار.
رزق: ( يتحدث بسرعة فائقة ) وسمعت صوت غالي المنظف يكَول انفجار إبراس الفرع هذا.. ع الشارع العام ..و الحمد لله ما مات أحد ..بس قسمت المطربة القديمة وكَعت عليهه البنكه واخذوها الإسعاف و البلكونه تفلشت و آني وكَعت من البلكونه على عربانة غافل هذي..
رضوان : هذي الغيرة العراقية ..تفلشت البلكونه و ما تفلش رزق.. والماتشيله الكَاع تشيله عربانة العروكـَ .
( مصلح المستشار الذي كان يتابع الحديث يشير بإصبعه فيهب فارس واقفاً ويتجه نحو مكان التصوير ).
فارس: أنا فارس غضبان سكرتير الأستاذ مصلح المستشار .. إذا ممكن اخ رزق ..المستشار يريد يكلمك .
جنان : روح ..إنفتح لك باب الفرج ..
رضوان : و لو آني مشغول و عندي مواعيد ..بس أكَدر أصور هسه.
جنان : طيب رضوان ..خلي أشرح لك الموضوع بالضبط..
( يكون رزق قد وصل الى حيث يجلس مصلح المستشار)…
مصلح : اخ رزق ..الإعلام يحب الإثارة..
رزق : يعني شلون ..الإثارة ..أفتح دكَمتين من قميصي و اعلچ..؟..
مصلح: لا..إحچي براحتك.. إنزل على المسؤولين الي ما يشعرون بمعاناتك ويعرضون حياة فنان و خياط رناني مثلك للخطر .. وكلما يكون كلامك قوي.. يصير تأثيرك قوي.. إحنه لازم نكافئ الشعب مو بس ننطي أجور للمشهورين .. هذي ورقة .. وبالمستقبل راح يكون بيناتنا شغل كثير .. تفضل .( يتوجه رزق حيث تقف جنان ورضوان، فيتوجه مصلح بكلامه لفارس. ). فارس صيح لي رضوان ..
( يذهب فارس حيث جنان ورضوان و رزق.. فيقترب ريسان من مصلح)
ريسان : أستاذ آني مشّبه بيك و لازغرن بجنطتك الدبلوماسية.. حضرتك تلتقي بالكرادة ..؟…
مصلح : لا.
ريسان : وآني هم عمري ما رحت للكرادة ..بيتنا بالطوبچي .. آني شفتك الصبح بالإنفجار .. أنت وهذا اللوكَي.
مصلح : من واجبي كمسؤول ..أهب للمكان الساخن وأشارك الناس معاناتهم .. وأكتشف النجوم وأشّغل الموهوبين .. وأنا جاي إلكم و جايب الخير إلكم و لمنطقتكم ..و إنت على رأس القائمة .. هذا زمن قناتنا ، راح زمن إذاعة وتلفزيون الصالحية .
ريسان : بس إنتم تبثون بالخارج ، ليش مركزين على أهل الصالحية ..؟.
مصلح : موشغلك ..داري خبزتك ..
ريسان : أستاذ أنا مغني و ممثل بانتومايم ومرتين طلعت بالتلفزيون بنشرة الأخبار أشرح الأخبار للصم والبكم و .. أهم شي عندي الأخلاق..
مصلح : أعرف كل شي عنك .. غيّر الفحم .. أنت متاكد هذا المعسل تفاح.؟.
ريسان : اي..تفاح من ظهر تفاح .. ماركة خيرالله تفاح ، شلون ما اعرف التفاح و هو الطلعنه من الجنة.
مصلح : هالمرة راح يدخلكم للجنة ..و رضوان يستقبلكم ..
(رزق و رضوان يتنافسان على اللقاء و جنان تحاول التهدئة )..
رضوان : شبيك رزق .. ما شايف ..السره إلي.. تره إنته وجهك مو تلفزيوني . آني من زمان أريد أكَلك وأخجل.
فارس: أنا فارس غضبان سكرتير الأستاذ مصلح المستشار ..إذا ممكن اخ رضوان .. المستشار يريد يكلمك .
جنان : روح ..إنفتح لك باب الفرج ..
رضوان : بس آني مشغول و عندي مواعيد ..
جنان : طيب رزق ..إتكلم بحريتك وبكل شفافية و..حسب توجيهات المستشار..
(يكون رضوان وفارس قد وصلا الى حيث يجلس مصلح المستشار فيجلس رضوان اليه و يتكلمان).
مصلح :رضوان ..انا مهتم بيك من زمان وإنت متدري..درست وضعك.. ولكَيت حل سحري لكل مشاكلك ..لمن تتكلم عن الإنفجار وإهمال الحكومة وتخلص كلامك.. تعال يمي هنا و نتفق إتفاق يخدمك ويخدم البلد.. وهذي ورقتين .. أجورك.
رضوان : ورقتين ..يعني يصيرن إشكَد بالدولار..؟.
مصلح : إش ..دنسمع ..( يتبع ).
