ابراهيم الجابري
شو خذت مو بس الگلب وياك ايدي الشاردة
ما مادهه لچف اي زند مگطوع گالو ساعده!!
ومشبر ايدي مو عمد چيف الاصابع ما غفن
ريحة محابس فاگده
لاگوني كل اهل الشمس جاساهم الحر الصدگ
وبصدري طگ اشگد رطب حت گالو الله يساعده
وي شيلة ايدي اتشاهدت چن زاتني لدرب اللحد
تخنكني شوغة والدة
لا يا عصف عطر الهوه وي رجله ليش امگاوده
شمدريني بجدامك مشي شمدريني بلسانك گضن
ما شفت بعيونك درب هالسفر شدري امواعدة
وخرت عيني من الوجه هيه اعله طولك شاهدة
چنه اعله گد مد الهوه اتوچدنه ما بين النخل
يتحسر الما صاعده
والتف على اخيالك ستر كل عقلي ينداس الخصر
ما چنت اريدك شو صرت نيتي اعله طولك گاعده
ماچنت اريدك لولاك
لو ما تشبگني بوجه جا ما عفتهم ذولاك
بايگ من اعيوني الصور وارسوم كل ناسي شلت
ظليت بس انه وياك
ماشيتك وما فكرت
وياك اظل لو مو تهت كل فكري اموتن فوگاك
بجروحي وانكتلك وفه وتنكت اترابك عالجرح
وانه الزِعل بس راضاك
ميت عليك اني صحت
واتگلي ماريدك متت جا بالگبر واحچي وياك!!!
كلهه ورضيت وما ضجت ضجة شوارع بالعقل
بس گلبي ما مل يهواك
وديتني لذاك الزمن وكت الحصار اتخيله
اهنا جسمي بس عقلي هناك
دورني وين اني صرت دور يسارك يمنتك؟
ليفوك ركز نظرتك بس روحي تفتر فوگاك!!
والهسه احبك للعلم
حبيت جرحك والزعل واعنادك و ما والا
بس ما احبن فرگاك
تكتب قصايد شوفتك
حافظلك عيون وشَعر وابالي يوميه اقراك
صح بيك ضربات وجفه
ومرغوب لكن لو رحت اتماشه وي وزن النعي
بس مرة اشوفن مگفاك…..
