يدك كلبي الك دكات ليلية
أحط اذني على الشريان أسمع كل غناويه
يترجملي النبض جلمات .. تاخذني وتفر بيّه
وهيس الروح ماهيه
تطوف ابدنيتك وسماك تتعبها وترد ليه
تسولفلي .. تذكرني بسوالف موش منسية
على اطراف اللسن هيه
تظل بيهه التعرفك زين تتشايم
يلن اربات زهدي وبيك صافي الدم
ياصخرة وعليهه الروج يتلاطم
يالصدرك وسيع وضاع بيك الهم
يافلتت زمان بصورة ابنادم
يا …. مدري شكول الوصف مايلتم
لاجنها ياشاعري هذي سواني الدهر
ويّاك أبد مانصف داس الضمير وعبر
خلاّك شجرة ابكهف محرومة شوف الشمس
وحتى الهوه المحصور بالحيطان شميته من امس
وحتى الشته والصيف بحسابك سوه
عندك سوه باجر وامس
وعندك الموت اليرهب ابنادم دفو
حنّة وعرس
كلها والوادم تناست
والسبب من الحمامة الماتحس
ذبتك ريشة وتظن عكبك تطير وماتحس
وكل جنح ينفض سبابيكه يطيح
وكل حجي مدغوش عنّك يظل راعية قبيح
والحجي ايمض بيك .. هيله
الحجي بإذنك يمر اخيال جيله
والسبب كلبك جبير .. وكلبك ابيض
والضمير البيك يسمر بيرغ ابيض
والهوى المر بيك عذري اواعديته
وانت كوكب ماسهه وتيه مدارة ومانسيته
ابشهكت الريّة شريته .. وانت شاعر
والشريف ايبيع ريته وماهو حاير
انته دنيه ودنيتك هالة مشاعر
انته جلماتك تلف داير مداير
انته جلماتك ضوه فوك المناير
انته جلماتك لعد كلبي جرح
انته جلماتك لعد جرحي جرح
وانته انته
انته ابو ( احجاية جرح )
انته ( ابو حجاية جرح)